శ్రీ అన్నమాచార్య కీర్తన

శ్రీ మద్వతీయ చరితామృత మన్నయార్య
పీత్వాపినైవ సుహితా మనుజాభవేయుహు
త్వం వెంకటాచలపతేరివ భక్తిసారం
శ్రీ తాళ్ళపాక గురుదేవో నమో నమస్తే

ఈ శ్లోకం, మహానుభావుడు తాళ్ళపాక అన్నమాచార్య కీర్తన సంప్రదాయానికి అంకితమైన ఒక స్తుతిశ్లోకం. ఇది నేరుగా శ్రీ వేంకటేశ్వరుని స్తుతి మాత్రమే కాదు అన్నమయ్య గారి భక్తి జీవితం, కీర్తన సేవ, గురుత్వం అన్నిటినీ సారంగా స్తుతించే వాక్యరూప గీతం. ఈ శ్లోకంలో అన్నమయ్యను ఒక కవి లేదా గాయకుడిగా కాకుండా, భక్తి అమృతాన్ని లోకానికి పంచిన గురుదేవుడిగా దర్శింపజేస్తుంది.

ఓ తాళ్ళపాక అన్నమయ్య గురుదేవా! మీ అమృతమయమైన చరిత్రను త్రాగినవారే నిజమైన జీవితం పొందుతారు. వెంకటాచలపతిలా మీరు భక్తి సారాన్ని లోకానికి పంచారు. మీకు మళ్లీ మళ్లీ నమస్కారాలు. ఇక్కడ చరితామృతం అనే పదం చాలా విశేషమైనది. అన్నమయ్య గారి జీవితం ఒక చరిత్ర కాదు, అది ఆధ్యాత్మిక అమృతం. చరితామృత భావన సాధారణంగా అమృతం దేవతలకు సంబంధించినది. కానీ ఇక్కడ ఒక భక్త కవిగారి జీవితమే అమృతంగా చెప్పబడటం భక్తి మార్గం ఎంత గొప్పదో తెలియజేస్తుంది. అన్నమయ్య చేసిన పని శాస్త్రాలను పండితులకే పరిమితం చేయకుండా, సాధారణ ప్రజల హృదయాలకు భక్తిని అందించడం. ఇందుకే ఆయనను వెంకటేశ్వరుడుతో పోల్చారు రాముడిలా క్షమ, కృష్ణుడిలా మాధుర్యం, వేంకటేశ్వరుడిలా కరుణ.

ఈ కీర్తనలోని సాహిత్య విలువలు సంస్కృత శ్లోకంలో భక్తి మాధుర్యం భాష సంస్కృతమైనా, భావం మాత్రం హృదయాన్ని తాకేంత సులభం. ఇది అన్నమయ్య సంప్రదాయానికి అద్దం పడుతుంది. ఈ శ్లోకం ఒక గురుస్తోత్రం. తెలుగు భక్తి సాహిత్యంలో గురువును దైవసమానంగా చూడటం అరుదైన విషయం కాదు, కానీ ఇంత మాధుర్యంతో చెప్పడం విశేషం. చరితామృతం త్రాగడం అన్నమయ్య కీర్తనలను వినడం, పఠించడం, ఆచరించడం అనే అర్థాన్ని ఇస్తుంది. ఇది గొప్ప సాహిత్య రూపకం. ఈ శ్లోకం మొత్తం ఒకే మాట చెబుతుంది: “భక్తిని నేర్పినవారికి నమస్కారం. కృతజ్ఞతా భావం”

అయితే

శ్రీ మద్వతీయ చరితామృత మన్నయార్య
పీత్వాపినైవ సుహితా మనుజాభవేయుహు
త్వం వెంకటాచలపతేరివ భక్తిసారం
శ్రీ తాళ్ళపాక గురుదేవో నమో నమస్తే

శ్లోకం ను ఆలపించిన తర్వాత కంటిన్యేషన్ ఈ కీర్తన అండి

ఎక్కడి మానుష జన్మం బెత్తిన ఫలమే మున్నది
నిక్కము నిన్నే నమ్మితి నీ చిత్తంబికను ||

మరవను ఆహారంబును మరవను సంసార సుఖము
మరవను యింద్రియ భోగము మాధవ నీ మాయ
మరచెద సుజ్ఞానంబును మరచెద తత్త్వ రహస్యము
మరచెద గురువును దైవము మాధవ నీ మాయ ||

విడువను పాపము పుణ్యము విడువను నా దుర్గుణములు
విడువను మిక్కిలి యాసలు విష్ణుడ నీమాయ
విడిచెద షట్కర్మంబులు విడిచెద వైరాగ్యంబును
విడిచెద నాచారంబును విష్ణుడ నీమాయ ||

తగిలెద బహు లంపటముల తగిలెద బహు బంధముల
తగులను మోక్షపు మార్గము తలపున యెంతైనా
అగపడి శ్రీ వేంకటేశ్వర అంతర్యామివై
నగి నగి నను నీవేలితి నాకా యీమాయ ||

ఈ కీర్తన ప్రారంభం అయ్యే “శ్రీ మద్వతీయ చరితామృతం” అనే శ్లోకం మహానుభావుడు తాళ్ళపాక అన్నమాచార్య గారి భక్తి జీవనానికీ, కీర్తనా సంప్రదాయానికీ అంకితమైన గురు స్తుతి. ఈ శ్లోకం ఆలపించిన తరువాత వచ్చే కీర్తన భాగం అన్నమయ్య భక్తి సాహిత్యంలో అత్యంత గంభీరమైన ఆత్మపరిశీలనాత్మక కృతి. ఇది దేవుణ్ణి పొగడటం కాదు మనిషి బలహీనతలను దేవుని ముందు ఒప్పుకునే నిజాయితీ గీతం.

ఈ కీర్తనలో భక్తుడు, శ్రీ వెంకటేశ్వరుడు ను ఎదురుగా పెట్టుకుని, తన జన్మ ఫలితం ఏమిటి? భక్తి ఎందుకు నిలవడం లేదు? మాయ ఎందుకు విడవడం లేదు? అనే ప్రశ్నలు తనకే తానే వేసుకుంటాడు.

ప్రారంభ పాదం – మానవ జన్మ ప్రశ్న

“ఎక్కడి మానుష జన్మం బెత్తిన ఫలమే మున్నది నిక్కము నిన్నే నమ్మితి నీ చిత్తంబికను” భక్తుడు ఇక్కడ గట్టిగా ఒప్పుకుంటాడు “ఈ మానవ జన్మ పొందినా, దాని ఫలితం నాకు ఇంకా దక్కలేదు.” నమ్మకం దేవునిపై ఉంది, కానీ జీవితం మాత్రం ఇంకా మారలేదు.

“మరవను మరచెద” పాదాలు : మాయ యొక్క బలం ఆహారం, సంసారం, ఇంద్రియభోగాలు ఇవన్నీ మరవలేకపోతున్నాను. కానీ, సుజ్ఞానం, తత్త్వం, గురువు, దైవం ఇవన్నీ మరచిపోతున్నాను. ఇదే మాయ యొక్క అసలు స్వరూపం. అన్నమయ్య ఇక్కడ ఉపదేశం చేయరు మనిషి మనసునే అద్దంలా చూపిస్తారు.

“విడువను విడిచెద” పాదాలు విరోధాభాసం పాపం, పుణ్యం, దుర్గుణాలు, ఆశలు విడవలేకపోతున్నాను. కానీ వైరాగ్యం, ఆచారం, క్రమశిక్షణ విడిచిపెడుతున్నాను. ఇది భక్తుడి ఆత్మవేదన. భక్తి మార్గం తెలుసు, కానీ ఆచరణ చేతకావడం లేదు.

ముగింపు భావం అంతర్యామి లీలా “అగపడి శ్రీ వేంకటేశ్వర అంతర్యామివై నగి నగి నను నీవేలితి నాకా యీమాయ” ఇది అత్యంత లోతైన పాదం. “నాలోనే ఉండి, నా మాయను నీవే ఆడిస్తున్నావా?” అన్న ప్రశ్నలో భక్తి, భయం, ఆశ్చర్యం, లొంగిపోవడం అన్నీ కలిసిపోయాయి.

ఈ కీర్తనలో దాగి ఉన్న సాహిత్య విలువలు ఆత్మపరిశీలనాత్మక భక్తి, పునరుక్తి సౌందర్యం, మాయ తత్త్వం ఇది దేవుణ్ణి పొగిడే గీతం కాదు. తనను తానే ప్రశ్నించుకునే భక్తి గీతం. మరవను మరచెద , విడువను విడిచెద అనే పద ప్రయోగాలు మనసులో తిరుగుతున్న సంఘర్షణను సంగీతంగా మారుస్తాయి. మాయను శత్రువుగా చూపరు. దైవ లీలగా చూపుతారు. ఇది విశిష్టమైన వైష్ణవ తత్త్వం. సులభమైన భాష గంభీరమైన భావం సాధారణ పదాలు, అసాధారణమైన తత్త్వం ఇదే అన్నమయ్య సాహిత్య ప్రత్యేకత.

"ఇష్టగీతం" వ్యాసాలు ఒక్కో వ్యాసం ఒక్కో పేజీలో ప్రచురించబడు తున్నాయి. ప్రతి పేజీలో ఆ వ్యాస శీర్షికతో ఒకటి లేదా రెండు పదాల థంబ్‌నైల్ బానర్ ఉంటుంది. క్రింద వరుస క్రమంలో ఇతర వ్యాసాల థంబ్‌నైల్స్‌తో పాటు Previous / Next పేజీ పది బానర్లు అందుబాటులో ఉంచాను. థంబ్‌నైల్ పై క్లిక్ చేస్తే మీరు ఆపేజీలకు వెళతారు. ఈ వ్యాసాలు వరుసగా రికార్డ్ చేసి " ఇష్టగీతం " యూట్యూబ్ ఛానల్‌లో కూడా ప్రచురించబడతాయి. చదవడం లేదా వినడం అనేది పాఠకుడి సౌలభ్యానికే ప్రాధాన్యం.