మనోధ్వని

మాట విలువ

మనోధ్వని - జీవిత అనుభవాల పరిమళాల వేదిక - బండ్ల సత్యనారాయణ మాట

మనది మాటలతో నిండిన ప్రపంచం. ఉదయం లేవగానే మొదలయ్యే మాటలు, రాత్రి నిద్రపోయే వరకు మనతోనే ఉంటాయి. కొన్ని మాటలు మనసును వెలిగిస్తాయి, కొన్ని మాటలు మనసును కాల్చేస్తాయి. మాట చిన్నదే అయినా, దాని విలువ మాత్రం అపారమైనది. ఒక మాట జీవితం మార్చగలదు, మరో మాట జీవితాన్ని చిదిమేయగలదు. ఆ మాట వెనుక దాగిన విలువే అసలు విషయం. అదే మనోధ్వని గుర్తు చేసే జీవిత సత్యం. ప్రతి మనిషి మాట విలువ వేరు. అభిప్రాయాలు ఎవరికి వారు మాటలలో కూడా చెప్పడం అనేది సహజం అయితే, కొందరి మాటలు కేవలం అలవాటు గా వస్తాయి ఆలోచించకుండా మాట్లాడుతారు. మరికొందరు మాట్లాడేముందు ఆలోచిస్తారు, ఇంకొందరు మాట్లాడిన తర్వాత ఆలోచిస్తారు. కొందరికి మాట బంధాన్ని కట్టే దారం, ఇంకొందరికి మాట ఆయుధం. ఈ భిన్నమైన మాట విలువల మధ్యే మన జీవితం సాగుతోంది. ఈ భిన్నత్వాన్ని అర్థం చేసుకోకపోతే, మాటలు మనల్ని కలపవు దూరం చేస్తాయి.

మాట విలువ మనస్తత్వంతో ముడిపడి ఉంటుంది. ఓర్పు ఉన్న మనిషి మాట మెల్లగా ఉంటుంది, కోపం ఎక్కువైన మనిషి మాట కఠినంగా ఉంటుంది. భయపడే మనిషి మాట అర్ధాంతరంగా ఉంటుంది, ధైర్యం ఉన్న మనిషి మాట స్పష్టంగా ఉంటుంది. మాటలో వినిపించేది కేవలం శబ్దం కాదు, అది మనసు స్థితి. మనోధ్వని మాటల వెనుక ఉన్న మనస్తత్వాన్ని గమనించమని మనల్ని ఆపుతుంది. చిన్న మాటలో దాగిన పెద్ద జీవిత సత్యం చాలాసార్లు మనకు ఆలస్యంగా అర్థమవుతుంది. “అలా అనకూడదేమో” అనిపించేలోపే మాట బయటికి వచ్చేస్తుంది. ఆ మాట తిరిగి వెనక్కి రాదు. క్షమాపణ చెప్పొచ్చు, కానీ ఆ మాట వదిలిన ముద్ర మాత్రం మిగిలిపోతుంది. అందుకే మాట విలువ అనేది మాట చెప్పిన తర్వాత కాదు, చెప్పే ముందు గుర్తుంచుకోవాల్సిన విషయం. మనోధ్వని ఇదే బాధ్యతను మనకు గుర్తుచేస్తుంది.

సమాజంలో మాటలు సంబంధాలను నిర్మిస్తాయి , కూలదోయిస్తాయి కూడా. కుటుంబంలో ఒక మాట సాంత్వన ఇస్తే, ఇంకొక మాట గోడలా మారుతుంది. స్నేహంలో ఒక మాట బంధాన్ని బలపరిస్తే, ఇంకొక మాట సంవత్సరాల అనుబంధాన్ని చెదిరగొడుతుంది. మాటల ప్రభావం మనం ఊహించేదానికన్నా ఎక్కువ. మాటలు గాయాలు చేస్తాయంటే నమ్మకపోవచ్చు, కానీ ఆ గాయాలు కనిపించకపోయినా లోతుగా ఉంటాయి. మనోధ్వని మాటలను మౌనంగా మార్చమని చెప్పదు. మాట్లాడకపోవడం పరిష్కారం కాదు. ఎలా మాట్లాడుతున్నాం అన్నదే అసలు విషయం. నిజం చెప్పడం అవసరం, కానీ కఠినంగా కాదు, స్పష్టంగా చెప్పాలి, కానీ అవమానంగా కాదు. మాటలో నిజాయితీ ఉండాలి, అదే సమయంలో మానవత్వం కూడా ఉండాలి. మాట విలువ అంటే నిజం, కరుణల మధ్య సమతుల్యత.

వివిధ మాట విలువల మధ్య భిన్నత్వంలో ఏకత్వంగా జీవించడం సులువు కాదు. ఎవరి మాట పద్ధతి వారిదే, ఎవరి భావ వ్యక్తీకరణ వారిదే. ఒకరి మౌనం ఇంకొకరికి నిర్లక్ష్యంగా అనిపించవచ్చు, ఒకరి స్పష్టత ఇంకొకరికి కఠినంగా అనిపించవచ్చు. ఈ తేడాలను అర్థం చేసుకోకుండా మాటలకే అర్థాలు కట్టేస్తే, సమస్యలు తప్పవు. మనోధ్వని మాటలకన్నా మనుషుల్ని ముందుగా చూడమంటుంది. మనిషి మాట విలువ కాలంతో మారుతుంది. అనుభవం పెరిగే కొద్దీ మాట తగ్గుతుంది, అర్థం పెరుగుతుంది. ఒకప్పుడు అవసరం లేని మాటలు, తరువాత అవసరమైన మౌనంగా మారతాయి. జీవితం నేర్పిన పాఠాలే మన మాటలను మలుస్తాయి. అందుకే వృద్ధుల మాటలో గంభీరత ఉంటుంది, యువత మాటలో వేగం ఉంటుంది. రెండూ తప్పు కాదు అవి అనుభవ స్థాయుల ప్రతిబింబాలు మాత్రమే.

మనోధ్వని చదివినా, వినినా, పాఠకుడిని ఒక ప్రశ్న అడుగుతుంది, “నా మాట విలువ ఏమిటి?” నేను మాట్లాడే మాటలు ఎవరికైనా బలాన్నిస్తున్నాయా? లేక భారమవుతున్నాయా? నా మాటలు నన్ను నిజంగా ప్రతిబింబిస్తున్నాయా? లేక పరిస్థితులకు తగిన ముసుగులా మారాయా? ఈ ప్రశ్నలకు సమాధానాలే మన మాటలను శుద్ధి చేస్తాయి. చివరగా, మాట విలువ అనేది గొంతు బలం కాదు, మనసు బలం. పెద్దగా మాట్లాడటం గొప్ప కాదు, అవసరమైనప్పుడు సరైన మాట చెప్పడమే గొప్ప. చిన్న మాటలో పెద్ద జీవిత సత్యం దాగి ఉంటుందన్న విషయాన్ని గుర్తు చేసే వేదికే మనోధ్వని - జీవిత అనుభవాల పరిమళాల వేదిక. ఇది గోల కాదు, ఇది మాట. అనుభవాల నుంచి పుట్టిన మాట. మనసును తాకే మాట. అదే బండ్ల సత్యనారాయణ మాట.

"మనోధ్వని" వ్యాసాలు ఒక్కో వ్యాసం ఒక్కో పేజీలో ప్రచురించబడుతున్నాయి. ప్రతి పేజీలో ఆ వ్యాస శీర్షికతో ఒకటి లేదా రెండు పదాల థంబ్‌నైల్ బానర్ ఉంటుంది. క్రింద వరుస క్రమంలో ఇతర వ్యాసాల థంబ్‌నైల్స్‌తో పాటు Previous / Next పేజీ పది బానర్లు అందుబాటులో ఉంచాను. థంబ్‌నైల్ పై క్లిక్ చేస్తే మీరు ఆపేజీలకు వెళతారు. ఈ వ్యాసాలు వరుసగా రికార్డ్ చేసి "మనోధ్వని" యూట్యూబ్ ఛానల్‌లో కూడా ప్రచురించబడతాయి. చదవడం లేదా వినడం అనేది పాఠకుడి సౌలభ్యానికే ప్రాధాన్యం.